Ang kapahamakan ng eleksyon sa ating homeowners association sa kasalukuyang panahon.

Ang article na ito ay naisusulat sa Tagalog dahil na rin sa pakiusap ng mga tao sa aming komunidad na ilathala ito nang sa gayon ay maintindihan ng nakararami.

Bagamat inyo nang nabalitaan na ang LEHOA, isang homeowners association na pinahahawakan at pinamamahalaan ng developer ay illegal sa batas ng Homeowners Association (RA9904, PD957) ay ipinipilit na magkaroon ng election sa Nobyembre 23 at 24 ng kasalukuyang taon. Ito ba ay nakabubuti o nakakasama? Alamin ang iyong karapatan bilang homeowner; at ang pakay ng Pro-Friends mula sa mga ginawa nilang Master Deed of Declaration of Restrictions ng Lancaster Estates at By-laws of LEHOA.

Ang LEHOA ay isang homeowners association na itinayo ng Pro-Friends na walang partisipasyon ng mga nakatira dito at naglathala ng mga batas sa ating komunidad na walang pag sasangguni na ginawa sa mga nakatira na dito. Isa itong paglinlang sa karapatan ng mga tao na dapat ay may hawak ng homeowners association at hindi ang developer. Ayon sa batas:

Sec. 15. Association Bylaws. - Ang by-laws ng homeowners association ay dapat sinangayunan ng mayorya ng mga nakatira sa kinasasakupan nito na naayon sa batas ng Pilipinas para sa homeowners association - RA9904

Ang masaklap, nang inilathala ang homeowners association noong Setyembre 2009, walang nangyaring pagsasangguni ayon na rin sa mga taong nakatira na dito sa panahon na iyon.

Ang malaking problema dito ay sa by-laws ng LEHOA, nakasaad na ang dapat mamuno sa LEHOA ay mga taong empleyado ng Pro-Friends. At ibibigay na lamang nila nang paunti-unti ang kapangyarihan sa mga nakatira dito; depende sa dami na nang nakatira sa kanilang proyekto. 

Ang ating komunidad, Lancaster Residences Phases 1-7 ay halos 90% na ang nakatira ngunit bakit ayaw pa ibigay ng developer ang HOA sa tao? Ito ay dahil na rin sa by-laws ng LEHOA na ipinatupad na di sinang-ayunan ng mga tao (na iligal ayon sa Sec 15 ng RA9904 batas ng Pilipinas).

Sa iligal na by-laws na ginawa ng Pro-Friends, may kapangyarihan sila na palawakin ang kapangyarihan ng LEHOA kasabay ng paglawak ng kanilang proyekto sa buong Lancaster Estates. Ito ang dahilan kung bakit kahit 90% na tayo sa Lancaster Residences ay wala silang balak ibigay sa tao ang pamumuno nito kasi kung isinama nila ang iba pang mga proyekto, ang LR-bagamat may 2400 units na ito, ay maliit lamang na porsiyento ito sa buong Lancaster Estates project. Ang Kensington na isa ring project sa loob ng Lancaster Estates ng Pro-Friends ay may 27 phases. Ang Manchester ay may 11 phases, at Somerset ay may 13 phases. Kasama ang Lancaster Village na may 2 phase at Lancaster Residences na may 7 phase, umaabot sa 59 phases ang dapat mapuno bago maibigay ng developer ang HOA sa tao.

Sa loob ng 5 taon, 12 phases pa lang ang may nakatirang tao, kasama na dito ang Lancaster Residences na may 7 phases. Kung susundin natin ang batas-batasan ng ginawa ng Pro-Friends, maaaring maibigay pa ang HOA sa mga tao matapos pa ang tatlong dekada!

Ang by-laws ng LEHOA ay hindi sinasang-ayunan ng batas ng Pilipinas

Dapat natin malaman na ang panghihimasok ng isang real-estate developer sa isang Homeowners Association ay iligal ayon sa batas ng Pilipinas sa PD957 at RA9904.

Ayon sa Section 27 ng PD957, walang developer ang may karapatan na magtayo ng homeowners association o mangolekta ng pera para dito.

Ayon din sa Section 52 ng RA9904, ang board of directors ng isang Homeowners Association ay dapat homeowner at hindi developer.

Ang eleksyon na nais ipalaganap ng Lancaster Estates Homeowners Association, Inc (LEHOA) ay para lamang sa block representatives at hindi board of directors. Walang kapangyarihan ang blockreps ayon sa by-laws na Pro-Friends din ang gumawa. Ang blockreps ay gagawin lamang na kagamitan ng developer para palawigin ang kanilang kapangyarihan at magpatuloy ang paghawak sa HOA na di sang-ayon sa batas.

Kapag sinuportahan ninyo ang eleksyon na ito ay bibigyan lamang natin ang developer ng rason para ipagpatuloy ang paggawa ng mga polisiya na di naman ikinukonsulta sa mga nakatira dito, kasama na ang mga pwedeng singilin sa atin.

Ano Naman ang Meron sa Mga Gustong Kumandidato?
Dahil sa by-laws na inilathala at ipinapatupad ng Pro-Friends, ang may kapangyarihan lamang na ehekutibo sa LEHOA ay mga board of directors na tila mga empleyado din ng developer. Kahit na malinis ang hangarin ng kakandidatong block representative ay wala siyang kapangyarihan na tumaliwas sa mga desisyon ng developer. Lalabas lamang na isa silang kagamitan upang ipagpatuloy ang illegal na pamamalakad ng HOA. Bagkus ang unang tatanggap ng galit mula sa tao na biktima ng patakaran ng developer ay mga block representatives. Nagawa na silang kagamitan, sila pa ang tatamaan ng galit ng tao.

Kung gusto ninyo mangyari ito, suportahan lang po natin ang eleksyon. Kung ayaw po ninyo ay huwag niyo po suportahan ito... huwag bumoto. 

Kung sang-ayon po kayo na di maganda ang dulot ng eleksyon na ito, huwag bumoto, kalampagin po ang ahensya ng HLURB upang ibigay ang homeowners association ayon sa batas na kung saan ang mga director na ito ay homeowners na inyong pinagkakatiwalaan at inihalal. Hangga't ang HOA ay hawak ng Pro-Friends, hindi po ito ligal at tayo po ang talo dito.

Mga iba pang babasahin:

• Homeowners Dues Illegally Being Collected by the Developer
  This article discusses the legality of HOA dues collection in Lancaster Residences by LEHOA
• LEHOA Bylaws and PD957 and RA9904
  The article explains PD957 and RA9904 which are the tenets of law for homeowners associations and compares the bylaws promulgated by LEHOA
• Estimated Collections of LEHOA
  This article gives an overview of the potential collection generation of LEHOA in comparison with other subdivisions.
• How LEHOA was "legalized" to be controlled by the real-estate developer.
  This article gives an eye-opener on how ProFriends made use of a master plan to hold the Homeowners Association.

PINDUTIN LAMANG ANG MGA BUTTONS SA BABA UPANG IKALAT. KATOTOHANAN SA IMPORMASYON ANG SIYANG MAGLILIGTAS SA KOMUNIDAD.